حوار صحفي: إسراء عزام

قصيدة "الحياة"

ناهد محمود 

الحياة ماشية 

بحلوها و مرها

بناس وحشة 

و ناس بنعزها

بيوم ممتع

و يوم ممل

شوية أميل 

و شوية أمِل

شوية فرحان و مبسوط 

وشوية أحس بخنقة الموت

دقيت علي باب الحظ

ملقتش ليا نصيب 

شاف جرحي مالأحباب

قالي معنديش ليك طبيب

فقولت أجبلي كتاب 

و أبعد شوية عن الأصحاب

بس لو حد دقلي باب

عمري ما أرده يا أحباب

دي الحياة زي القهوة

تحسها شوية سادة 

و شوية سكر زيادة 

كل يوم يعدي في تجربة جديدة 

الحياة الحلوة والله 

عننا ما بعيدة 

كل يوم بيفوت

بيقرب قطر الموت 

فعيش حياتك حر 

طالما مش بتضر 

و أكتب قصة جديدة 

أو حتي أكتب قصيدة 

طلع نفسك مالأكتئاب

و وفر علي نفسك العذاب 

حياتنا مش كورة ترميها الأيام 

و لا ينفع نقف 

لازم نبص لقدام

و أيامنا هتتعدل بثقتنا بالله

و شوية شوية هنعدي 

صعوبات الحياة 

بص للجانب الإيجابي

و أبعد عن السلبي

عشان مترجعش تقول 

الذنب مش ذنبي 

الحياة شوية ليك و شوية عليك

خليك قدهاا و أبعد عن غُلبها

 هو ساعات بيبقي وراك وراك

و بتكتر الحوارات

و بتقعد تنزل دموع و تقول آهااات

بس والله يبني حقك مبيضعش

ده واللي خلق الخلق ربك مبيسيّبش

متخفش من المصير 

ده ربك العالم القدير 

خش في معاركك و واجه

و امحي هزايمك و بارد 

الأنتصار بشرف طعمه حلو 

ما دام جه من الله القادر 

والأمل لسه موجود 

طالما مطالكش الموت 

و نور جي في الطريق

و صوت أمل بيندهلك

و فرحة شجن جايالك

ده طعم الفرح مكتبولك

و طعم اليأس مرفوضلك

ده في أيدك مفتاح الأمل

و هتعدي كل المحتمل

ربك عارف تقدر علي ايه

السر فيك مش فيه

و واحدة واحدة هتعدي

و النور ييجي ييجي بعد الضلمة 

ده كلام ربك مش كلامنا

حتي لو وقعت في حفرة

إن مع العسر يسرا

إن مع العسر يسرا

ناهد محمود|همج لطيف