حوار صحفي:أسماء سامح.
الصحفيه:هَنـد حسـن.
قد تظن لأنها فتاة فهى ضعيفة وليس لها شأن عظيم لكن عزيزى فتاتنا غير فهى قوية لا تعرف للمستحيل طريقًا ناجحة مستقلة متعددة المواهب تستحق كل التقدير والأحترام وأن تضيء العالم فهي نجمة جديدة متألقة تستحق أن تظهر للجميع.
المبدعه: أسماء سامح سالم
الموهبه: متعددة المواهب" كتابة شعر، قصص، روايات، خواطر"
كنتُ أؤد أن أعلم كيف تعلمتِ الكتابه ومتى، وكيف بدأتِ في المجال الأدبي؟
نرجع بالزمن لسبع سنوات كنت في الصف الأول الإعدادي حينما اكتشفت موهبتي بس فضلت مخبياها عن الكل حتى أهلي لاننا مجتمع ريفي وغير كدا مصري ومكنتش شايفه إنهم هيقدروا موهبتي لأني ببساطه بنت، ثم تركت لقلمي العنان لكن كان مازال بداخلي بعض الرهبة من سخرية المجتمع، وصلت للمرحلة الثانوية وفقط معلمي الإعدادية وزملائي اللي كانوا عارفين إني من هواة الكتابه، في الصف الأول الثانوي جانا شاعر زياره وقتها كنت متوتره بالذات لما سأل:" مين هنا بيكتب؟" فضلت ساكته لحد ما احد المعلمين-رحمه الله- شاور عليا قمت بتوتر وألقيت قصيده عجبته ومكنتش متوقعه يحصل دا واداني معاد تجمع الأدباء ف قصر الثقافة حسيت فعلًا وقتها ولأول مره ف حياتي إني حققت إنجاز، حضرت معاهم وبدأت اتقن الشعر الفصيح والعامي درست ست بحور شعر واستمريت أربع سنوات بعافر إني أحقق إنجاز أكبر وأوصل.
هل لنا أن نطلع على أعمال لكِ؟
دي قصيدة كتبتها بعد رؤية حال مجتمعنا
"الضياع"
شتتوني أول أما
دخلوا بيا للمحاكم
كنت فاكر إني غالي
فجأه عملولي مآتم
كنت فاكر إني ابن
لأم وأب ملوش مثيل
لقيت ف لحظه إني ربح
هشموه خلوه قتيل
مش هفكر تاني خالص
فكري فيهم كان عسير
اشتروا الضحكه بكدبه
حب ايه دا بينوا بير
كنت طفل فكبروني
والطفوله معشتهاش
اتحفر ف قلبي حزن
ضحكة أمي مشوفتهاش
فكروا فيا ك ابن
مش ك سلعة سوق يومين
يوم عايزني وتاني لأ
مبقيتش عارف جيت منين
أنا ابن مين أنا ابن مين
أنا الضياع وسط السنين.
هل لنا أن نتطرق قليلًا لبدايتكِ في الكتابه والمحطات التي أثرتك ككاتبه؟
تحدثت عن ذلك سابقًا، كانت البداية صعبة فقط لرهبتي وخوفي كنت بس محتاجه اثق ف قدراتي ومستناش ثقه من الناس وقتها كنت محتاجه بس يكون عندي يقين إني لما هتعب هوصل ايا كانت الظروف وحتى لو كنت بنت.
نصيحتي أن تبدأ بالقراءة ثم القراءة ثم القراءة ليه بقا؟ علشان كل ما هتقرأ اكتر كل ما هيكون عندك ثروة لغوية أكبر وتكون كاتب مبدع، متزعلش من اي انتقاد يتوجه ليك واتعلم ازاي تستغله لصالحك مهما كان قاسي، اتعلم من الكبار لأنهم خاضوا المسيره قبلك ومتشوفش نفسك انك خلاص وصلت احنا بنفضل نتعلم ونسطر حروفنا لحد ما نموت لا بنقف ولا لينا قمه هنوصلها ونقف اتعلم ازاي تمشي على قافيه واتقن اللغة وقتها حاول تنوع في كتاباتك يعني مره تفاؤل مره حزن وهكذا هتحس إنك فعلا عملت إنجاز لما متقفش ف محطه واحده.
ما السبيل الأمثل لصقل المهارات، من ممارسة أو ورش أو لديك نصيحة أخرى؟
أي موهبة محتاجه انك تحافظ عليها وتنميها لحد ما تكون مهارة وبالنسبة للكتابة فالسبيل الأمثل هو القراءة، يبدأ الأمر بالقراءة فتأتي الفكرة.
هل تود تقديم الثناء لأحدهم؟
ياااه كتير أولهم معلمي الإعدادية والثانوية أهمهم أستاذي رحمه الله" محمود جامع" وزملائي اللي شجعوني وأثنوا على كتاباتي، بشكر كل شخص وقف جنبي وكانلي سند ف مسيرتي من أهل وصحبه ومعلمين وأدباء، وبشكر ربنا قبل أي حد إنه منحني فرصه ذهبية كبنت إني أثبت إن البنت قادره تحقق إنجازات.
ما رسالتك لمن يقرأ هذا الحوار سواء كان الآن أو بعد عدة أعوام؟
متيأسش مهما حصل واياك تبطل تحلم، ولو ضاع حلم اصنع غيره ألف، متسمحش للأحلام تسيرك وتتحكم فيك انت اتحكم فيها واللي باظ منك لو متصلحش سيبه وابني غيره متقفش وخلي عندك ثقه ف قدراتك متستناش ثناء من حد أثني انت على نفسك.
ذلك حواري الأول فيها والأجمل أيضًا، شكرًا لكم أنكم منحتموني فرصة لأسطر حكايتي.
أتمنىٰ لك تحقيق ما تتمنى.
تعليقات
إرسال تعليق