حوار صحفي: إسراء عزام

 مقال: مرنبتاح

 الكاتبة: يارا الهواري 

تصميم: عبدالله الوالي

رابع ملوك الاسرة 19، ترتيبه بين اخواته الـ 13، هنتكلم عن الملك

 "مرنبتاح"

مرنبتاح هو ابن رمسيس الثاني ولما تولى الحكم كان سنه كبير يعني حوالي 60 او 70 سنة، واول حاجة عملها نقل العاصمة من "بر مسيس" لـ "ممفيس"وبنى قصر ملكي جمب معبد بتاح، والقصر تم اكتشافه سنة 1915 بواسطة بعثة جامعة بنسلفانيا الامريكية

مرنبتاح كمان عمل حملة عسكرية خلال العام الخامس من فترة حكمه، واللي كانت على الليبيين جزاء ليهم انهم ساعدوا شعوب البحر على غزو مصر وانتهت الحرب بفوز مرنبتاح.

اللوحة المعروضة دي اكتشفها عالم المصريات الانجليزي "فليندرز بيتري" سنة 1896 في معبد مرنبتاح الجنائزي وتعتبر الاولى من نوعها في التاريخ المصري القديم.

اللوحة طولها 330سم، عرضها 160سم، سمكها 32سم

طب ايه اللوحة دي أصلا؟

بص ياسيدي، اللوحة دي كانت أصلا لمعبد الموتى لـ "امينوفيس الثالث" اللي كان تابع للاسرة الـ 18" مكتوب على خلفيتها تقرير عن المنشات اللي عملها الملك غرب طيبة وفي الاقصر والكرنك.

في عهد العمارنة اتشال جزء من الصيغة المنحوتة واستخدمها "سيتوس الاول"كـ لوحة تذكارية لـ امون.

على اللوحة هنلاقي الاله امون رع في المنتصف، وفي اليمين الملك امينوفيس الثالث يقدم ماء بارد ونبيذ لـ امون رع وجمبه الاله خنس، وفي اليسار هنلاقي مرنبتاح يستقبل السيف المقوس من امون رع وجمبه الالهة موت.

طب مرنبتاح اندفن فين؟ وفين المومياء بتاعته؟

مرنبتاح اندفن في مقبرته بوادي الملوك وهي المقبرة رقم 8هناك

ونقش مرنبتاح على الممر المنحدر بمسافة 80متر داخل مقبرته لحد حجرة الدفن نصوص من كتاب البوابات

أما بالنسبة للمومياء اكتشفها "فيكتور لوريت" سنة 1898 في خبيئة بمقبرة امنحوتب الثاني مع 18 مومياء تانية،

وبعد فحص المومياء اتضح ان مرنبتاح كان يعاني من التهاب المفاصل وتصلب الشرايين في اواخر ايامه.

طول المومياء 1.71 م، كان اصلع وملامحه قريبه من ملامح ابوه "رمسيس الثاني" ولكن قياسات الجمجمة كانت قريبة جدا لجمجمة جده "سيتي الاول "

وبس كدة...سلام

-يارا الهواري