حوار صحفي: إسراء عزام

 اسكريبت "سكون تحت بند الحب"

رشا مُنير

 سارا محمد

-بيحبني، مبيحبنيش، بيحبني، مبيحبنيش، بيحبني..

=هو مين ده!! 

-إيه! في إيه! مين! 

=أيهم بضحك: صباح الخير يا أحلام 

-في سرها: صباح النور يا قلب وروح وعقل أحلام 

=يابنتي!!! 

-إيه! مين! أأه!! صباح النور يا أيهم، صاحي دلوقتي ليه؟

=نادين عايزاني معاها عشان نشتري شوية حاجات، سيبك المهم عايز كوباية نسكافيه من الخصوصي ليا 

-بيأس: حاضر، خمس دقايق وهتلاقيها عندك 

*أنا أحلام، ٢٣ سنة متخرجة بقالي سنة من إعلام بإمتياز ومعرفتش اشتغل لإن خالتو مش شيفاني مؤهلة لده ومينفعش أعارضها لأنها إللي ربتني بعد وفاة والدي ووالدتي وجميلها هشيله وهفتكره العُمر كله، أنما أيهم بقا ده حكاية تانية خالص، طول بعرض بعضلات ولا أبطال السينما خسروه وقلبي مش عارف يكسبه لأن للأسف إللي كسبت نادين، وبعدين صح الحق عليا ما أكيد مينفعش احب حد من اهتمامه ولا من عيونه البني ولا عشان ضحكته حلوه ولا عشان بيحب يشرب من أيدي نسكافيه! 

=بخ، لوما قلب روان سرحانة في إيه! 

-وأنا هسرح في إيه يا فرقع لوز أنتِ!!

=عشان أيهم مثلًا 

-ياريت بلاش كلام فاضي مثلًا! 

=برضو مش عايزة تحكيلي 

-هحكيلك إيه؟ إللي بيحكِ ده بيكون عنده حاجة يقولها بس أنا معنديش، ممكن اعمل النسكافية بقا؟ 

=ممكن بس بكرا كل حاجة هتبان 

*أحلام خلصت النسكافية وطلعته لأيهم في الجنينة وكانت طالعة لاوضتها 

=أحلام تعالي هنا 

-نعم يا خالتو، في حاجة؟ 

=في إنك قربتِ تنسي نفسك وطموحك شكله بيعلى أوي، بس أنا خايفة عليكِ عشان الواقعة متكسرش رقبتك

-بس.. بس أنا معملتش حاجة!!

=أوعي تكوني فكراني هبلة ومش واخدة بالي من نظراتك لأيهم ولا هو كمان نظراته ليكِ وطريقته معاكِ عاملة إزاي، ومتنسيش كمان إن أنا إللي 

-أحلام مقاطعة لكلامها: إن أنا إللي لميتك من الشوارع بعد ما أمك وأبوكِ ماتوا ومحدش من عمامك رضي إنه يتكفل بيكِ، افتكري دايمًا إنك يتيمة، افتكري دايمًا إنك مينفعش تعيشي عشان ملكيش أب وأم، مينفعش حتى تحلمي عشان محدش هيسندك، حفظت يا خالتو والله حفظت، يوميًا من وقت وفاتهم وأنتِ بتقوليلي الكلام ده، ده أنا قربت أنسى أسمي واحط الكلام ده بداله! بس عايزة اقولك إنك فكرتي فيا غلط وإن مفيش شيء جوايا لأيهم هو.. هو اخويا مش اكتر 

=أيهم مقاطعًا لكلامهم: هو حصل إيه لكل ده، حد يفهمني

-أحلام بكسرة: خالتو بس كانت بتفكرني بمكانتي في البيت مش اكتر، عن أذنكوا أنا طالعة أوضتي

=هو كل يوم يا ماما! مبتصعبش عليكِ أبدًا!!

_بتدافع عنها ليه أنا مش فاهمة! متنساش يا أستاذ إن خطوبتك كمان كام يوم!

=خطوبة! دي صفقة، أوعي أبدًا تسميها خطوبة عشان أنتِ عارفة كويس أنا موافق عليها ليه

_جرب تغير كلامك وشوف أنا هعمل إيه 

            *فلاش باك*

=ست الكل صباح الفل يا حبيبتي 

_صباح الفل يا حبيبي، شكلك عايز حاجة

=بصراحة كده أنا عايز اتكلم معاكِ في موضوع 

_اتفضل يا حبيبي سمعاك 

=أنا عايز اتجوز أحلام

_أنتصار بعصبية: أنت بتقول إيه!!

=عايز اتجوز أحلام، أنا بحبها وهي كمان بتحبني ومش عايز اعمل خطوة من وراكِ، وأظن إني كبير كفايا عشان اختار شريكة حياتي!

_لو أخر بنت في الدنيا مش هتتجوزها، أنت سامع! 

=ماما دي أحلام! 

_ما عشان هي أحلام فـ لأ يا أيهم سامعني، إلا قسمًا عظمًا هأذيها أذى عُمرك ما تتخيله 

=تأذيها! 

_لو اطول اقتلها.. هقتلها، جرب أنت بس وشوف بس ذنبها هيكون في رقبتك

                 *رجعنا تاني*

=أيهم بصلها بغضب وقال: مش عارف عقدك دي جيباها منين وليه بتكرهي أحلام أوي 

_طموحها عالي زي أمها الله يرحمها، ربنا خلصني من واحدة.. وعقبال التانية 

*أيهم سابها ومشي من غير ما يرد عليها 

=روان، رواااان 

_روان في الخدمة يا برو 

=اطلعي شوفي أحلام 

_حصل حاجة ولا إيه

=ماما زودت معاها الكلام 

_طب ما تطلع تشوفها أنت 

=مينفعش

_لو تقولي بس في إيه وإيه إللي بيمنعك وبيمنع حبك ليها

=اطلعي بس دلوقتي، هي محتاجة حد معاها 

*عند أحلام 

-بعياط وصوت مسموع: محدش بيتمنى يكون يتيم، محدش بيتمنى يعيش الباقي من عُمره في بيت حد تاني، أنا اتنازلت عن كل حاجة كنت بحلم بيها عشان.. عشان يتيمة، مينفعش اشتغل بعد الكلية عشان يتيمة، مينفعش يبقى ليا صحاب عشان يتيمة، مينفعش أعمل أي حاجة عشان يتيمة وعشان مفيش حد هيدعمني ويزود ثقتي في نفسي، حتى.. حتى أيهم كان حنين وجميل معايا ومش عارفة هو كمان حط مسافات بينا لحد.. لحد ما في يوم وليلة هيخطب خلاص وبقا مع واحدة تانية، ماما، بابا، وحشتوني وحشتوني أوي، بنتكوا مفرحتش من قلبها من يوم فراقكوا، ربنا يجمعني بيكوا في أقرب وقت عشان مش قادرة، غصب عني مش قادرة *وانهارت في العياط 

_دخلت عليها روان وخدتها في حضنها وقالت: حقك عليا، حقك عليا أنا يا حبيبتي، أنتِ عارفة خالتك يعني بتفضل تقول كلام وخلاص 

-اتعودت خلاص 

_ما أنتِ برضو مينفعش تسكتِ على كل شيء هي بتقوله، في حاجة اسمها اعتراض، في حاجة اسمها لأ، في حاجة اسمها كفاية 

-مينفعش، خالتو من ريحة أمي، وهي إللي كملت تربيتي وليها كل الحق ومينفعش اعترض على أي شيء، مينفعش انكر الجميل يا روان

_كل حاجة هتكون كويسة، خليكِ واثقة في ربنا 

            *بعد مرور أربع أيام*

_أحلام، يا لومااااا 

-قلب لوما عايزة إيه؟ 

_خُدي ياستي 

-إيه ده؟

_فستان عشان تلبسيه في الخطوبة انهارده

-ليه يا روان كده، كنت هلبس أي حاجة من عندي 

_متجادليش كتير ويلا عشان نلحق نجهز 

                  *بعد مرور ساعات*

*أحلام في اوضتها وعماله تنادي على روان عشان تساعدها، وفجأة باب اوضتها خبط 

-يابنتي بتخبطي ليه ادخلي يلا 

=________

-روان!! تعالي اقفليلي الفستان عشان مش عارفة 

=________

-شكرًا ليكِ أوي. ها بقا إيه رأيي.. إيه ده!

=إيه؟

-جيت هنا أمتى وكنت ساكت ليه!

=كنت معدي بالصدفة وقولت اساعدك 

-شكرًا بس أنا مش محتاجة لأي مساعدة منك 

=للدرجة!!

-انهاردة خطوبتك 

=برضو متعرفيش حاجة 

*قرب منها ومسك أيديها وحطها ناحية قلبه 

=ده، صدقي ده وصدقي عيني لما بتشوفك دول مبيكدوبش مهما حاولت أنا اكدب

-شديت أيديها وبعدت عنه وقالت: غلط، وجودك هنا غلط ودقة قلبك غلط وعينك لما بتشوفني غلط، غلط ومينفعش دول ملك واحدة تانية، بعد اذنك اتفضل من هنا 

*سابها ومشي 

-أحلام لنفسها: أهدي أهدي أهدي، هو هيخطب وفي واحدة في حياة، كأن مفيش حاجة حصلت، كأن مفيش حاجة حصلت، أهدي أهديي 

*شربت مياة وعدلت الميكب بتاعها وخدت نفس عميق ونزلت 

*كل المعازيم كانوا عينيهم على أحلام، فستان أحمر طويل وبكم ومكشوف من الضهر، ميكب سمبل ومبين قد إيه عيونها الزُرق حلوين، حتى تسريحة شعرها كانت بسيطة بس جميلة 

_بجد أعطيكِ 100/100 خطفتي الأنظار من العروسة 

-بس يا بكاشة مش للدرجة

_طب لو أنا بكاشة كل دول كمان بكاشين، فعلًا أنتِ طالعة بتجنني انهاردة 

-روان متحرجينيش اكتر من كده 

*عند أيهم وخطيبته

_جرا إيه استاذ أيهم مش ناوي تشيل عينك من عليها!

=أنتِ بتقولي إيه!

_بقول إللي لاحظته، من وقت ما ست الحسن نزلت وأنت مش معايا 

=أنا عُمري ما كنت معاكِ وأنتِ عارفة ده كويس 

_يوووه هو كل شوية، ليه مقدرتش تحبني زي ما أنا حبيتك، ليه أثير حبها، ليه مش شايف حبي ليك

=الحب ده أرزاق، محدش بيحب حد بالعافية!

_تمام أوي، أنا هوريك إزاي ترفضني كده 

*سابته وقامت راحت عند أحلام وشدتها من أيديها وجابتها عند أيهم وقالت: يا جماعة اسمعوني، طبعًا انهاردة كان المفروض يوم خطوبتي على حبيبي أيهم بس للأسف في واحدة مش محترمة سرقته مني وخلاص مبقاش عايزني *بدموع تماسيح* وأنا اهو بقولها جدعة، جدعة إنك عرفتي تاخدي واحد من خطيبته، جدعة إنك عرفتي تدمري بيت لسه متبناش، جدعة يا خرابة البيوت يا خطافة الرجالة 

*أحلام مش عارفة تقول إيه ومصدومة 

*أيهم لسه هيتكلم أمه قاطعته وقالت: في إيه، إيه المهزلة إللي بتحصل دي 

ردت عليها نادين بعصبية: استاذ أيهم أبن فؤاد بيه وانتصار هانم كان بيستغفلني، بيخطبني وهو بيحب البتاعة دي اللي اسمها أحلام، وقال إيه فاكرني هبلة بس لأ، مش نادين الصاوي اللي يضحك عليها 

أحلام بإحراج؛ محصلش يا خالتو والله محصلش حاجة من إللي هي بتقول عليها 

انتصار ضربتها بالقلم وزعقت وقالت: اسكتي أنتِ خالص مش عايزة اسمع صوتك، طالعة لأمك الله يرحمها، أنا اللي غلطانة عشان جبت خرابة بيوت عطفت عليها وخليتها وسط ولادي 

أحلام بعياط: أنا.. أنا هقبل بكل حاجة هتقوليها عليا، بس.. بس أمي لأ 

انتصار بعصبية: وأنتِ كمان بتردي عليا يا قليلة الأدب! جاية تضربها أيهم مسك أيديها وقال: كفاية بقا كفاية، حرام عليكِ هي معملتش حاجة

_اطلعي برا يا أحلام 

=بتقولي إيه يا ماما!! 

_اطلعي برا يا أحلام 

-يا خالتو هروح فين دلوقتي..

_زي ما سمعتِ، مش هتقعدي معايا دقيقة كمان، أنتِ فاهمة!! راحت ناحية أحلام ومسكتها من أيديها وخدتها لحد الباب ووقعتها وكملت: مش عايزة اشوف وشك تاني، واحدة منحوسة زيك ابوها وامها ماتوا وانا عطفت عليكِ وبعدين تعضي الايد اللي اتمدت ليكِ، إلا أبني يا أحلام سامعة! 

*أحلام مصدومة من إللي خالتها عملته معاها وإزاي تذلها وتهين كرامتها كده قدام الكل، الناس كلها بتبصلها باستحقار، عينيها جت في عين أيهم ودار بينهم كلام هما بس إللي سامعينه 

=أنا أسف 

-أنت معملتش حاجة 

=ضعفي وعدم شجاعتي دلوقتي، بتأسف عليهم 

-أنت مش ضعيف وده اللي مفروض يحصل، لو عملت غير كده هتثبت كلامهم.. إني.. إني مش كويسة

=أنا بحبك يا أحلام 

-مينفعش

=أديني فرصة 

*دموع نزلت من عينيا وسابتهم ومشيت  

=أيهم بعصبية: برا، كله يطلع برا 

*بعد دقايق الكل كان مشي والفيلا فضيت على أيهم وروان وانتصار

_عارفة كنت دايمًا فخورة بيكِ وكنت بقول أنا عندي أحسن أم في الدنيا، وكنت بقول اكيد في سبب من إللي بتعمليه مع أحلام بس انهارده اكتشفت وشك الحقيقي وعرفته، أنا مش عارفة إزاي هعرف اقولك يا ماما بعد كده، لأنك.. لأنك مش جديرة أبدًا باللقب ده *وسابتها وطلعت على أوضتها 

=مبسوطة يا انتصار هانم باللي عملتيه 

_جدًا وضميري مرتاح 

=ضميرك! هو أنتِ عندك ضمير! أنتِ إنسانة جشعة ميهماش غير مصلحتها وبس

_مبفكرش غير في مصلحتي! لو كده مكنتش غصبت عليك عشان تخطب نادية بنت أهم رجل أعمال في البلد وخليتك تشيل من دماغك أحلام إللي متمتلكش حتى هدومها إللي عليها و..

=أيهم مقاطعًا لكلامها: كفاية! كفاية مش عايز اسمع منك كلام تاني، جشعك وطمعك كان سبب كافي عشان ابقى ضعيف قدام حبي! بس خلاص من دلوقتي أنا عرفت أنا هختار مين ومش هخاف منك عشان أنا هحمي أحلام ولو قربتي عليها أنا إللي هقف قدامك 

_لو طلعت برا الفيلا هحرمك من كل الأملاك

=مش بتوعك ومش بأسمك وملكيش الحق تمنعيني ولو هيكون ليكِ الحق فأنا مستعد أخسر أي حاجة في سبيل إني اكسب أحلام وحبها 

             *بعد 24 ساعة*

=روان لسه معرفتيش عنها حاجة! 

_مش عارفة بجد الاقيها، كأنها اتبخرت 

=دلوقتي هقدر اعمل بلاغ في القسم ويارب يلاقوها 

      *بعد كام ساعة من البلاغ

_أستاذ أيهم في أخبار جديد

=طمني!!

_المواصفات اللي بتسأل عليها موجودة في مستشفى السعودي 

=تمام انا رايح دلوقتي شكرًا لتعب حضرتك 

       *بعد ساعة

=لو سمحت أحلام إبراهيم جاد في غرفة رقم كام!

_٣٠٧ في الدور الرابع 

*بعد دقايق أيهم كان وصل للغرفة والدكتور كان طالع منها 

=ممكن حضرتك تطمني على أحلام!

_هي بقت أحسن كتير عن امبارح ونقدر نكتبلها خروج عادي 

=طب الحمدلله، بس هي حصلها إيه!

_امبارح في ناس جابوها وكان حادث بس عن طريق الخطأ وهي بنفسها الصبح اتنازلت عن المحضر 

=تمام يا دكتور متشكر لحضرتك، أنا هدخلها 

-جيت ليه!

=مكانش ينفع مجيش

-مكانك هنا غلط 

=مكاني غلط لو مش جنبك، أنا أسف 

-على إيه 

=عشان مكنتش شجاع، عشان اتخليت عن حُبنا لمجرد إن أمي كانت رافضة بس هي هددتني بيكِ وأنا اقدر اخاطر بأي شيء إلا أنتِ! بس.. بس أنا دلوقتي فهمت غلطي، وفهمت إن لازم اكون مكان ما تكوني 

-طب والناس هيقولوا إيه!

=الناس طول عُمرها بتتكلم، ربنا شايف إن محدش فينا عمل حاجة غلط، ولا كذبنا ولا غشينا حد، إحنا بس بنحب بعض وعايزين حُبنا يشوف النور ومحدش يقدر يدفنه، أنتِ حلمي الوحيد ولازم احققه لأن أيهم بدون أحلام وحيد! 

-بحبك 

=وأنا بحبك بس بشرط، تعمليلي نسكافيه!

-العُمر كله اعملك نسكافيه 

=يكفيني إن طول العُمر تحبيني 

              ________________________

•في قانون الحب كُن شجاعًا دائمًا ولا تتخلى عن حُبك مهما حدث 

•من يريد سيفعل المستحيل 

•طالما القلوب متحدة والأيادي متكاتفه لا أحد يستطيع التفرقة بين الشخصين 

•القلوب المخلصة دائمًا تفوز

رشا مُنير|همج لطيف

رشا مُنير|همج لطيف