حوار صحفي: إسراء عزام

 حوار صحفي: صلاح موسى.

الصحفي: عادل عصام.

مواهب اليوم هم القدوة غدًا، هم أساس بناء أي مجتمع، هم أشخاص يعلمون جيدًا أن الطموح ليس له أي نهاية، وأن الحلم يُمكن تحقيقه بالإجتهاد والعزيمة القوية، واليوم معنا أحد هؤلاء الموهوبين. 

سنك: 22

الموهبة: شعر عامية

حدثنا قليلًا عن بدايتك:

 انا كنت بكتب وانا صغير جدا يعني في المرحلة الابتدائية كنت بكتب كلام أغاني، كنت بجيب أغنية مشهورة واغير كلماتها واكتب كلام مختلف على نفس اللحن ، وكنت بكتب قصص وكان عندي مواهب تانية كمان زي الرسم والغناء وإلقاء الخُطب الدينية في الإذاعة وقراءة القرآن يعني تقريبا كنت متعدد المواهب بمعنى الكلمة ، لكن طبعا بدون هدف ولا حتى تفكير في الجاي ، لكن طول عمري معجب بالشعراء وبنبهر بموهبتهم ، ودايما كنت بتمنى ان صوتي يكون واصل للكل ، وفي المرحلة الثانوية كتبت كذا قصيدة بالعامية وكمان بالفصحى، ولما نزلتهم على اليوتيوب لقيت دعم او عجبوا الناس ، ومن هنا كانت البداية وبدأت اوصف حالي في القصايد واعبَر عن مشاعري وكنت بفضفض للشعر خصوصا اني شخص انطوائي

لكل شخص شخص آخر يدعمه، فمن هو داعمُك؟ 

بحِس ان محدش دعمني بمعنى الكلمة ولكن طبعا كان فيه ناس بتقول كلمة حلوة على السريع كده زي مثلا أهلي والبعض من معارفي، اللي هو مثلا عاش كمل ربنا يوفقك وحاجات زي كده بصراحة كان نفسي ألاقي دعم أكبر في الوقت ده أو على ألأقل ألاقي منهم إهتمام شوية بس خير ، شكرا لهم برضه على كل كلمة حلوة قالوها .

ما هي طموحاتك المُستقبلية؟

انا عايز أعمل إسم لنفسي مش في مصر بس ولا في الوطن العربي انا حلمي اكبر من كده ، بشوف إن لازم صوتي يوصل للكل وأظن كلنا من حقنا نحلم  ونسعى للحلم ده  ، كل الناس الناجحة اللي احنا نعرفهم بدايتهم كان حلم صغير ، وطالما قدروا  يوصلوا لشيء انا كمان اقدر اوصل زيهم وأكتر .

وما هي الخطوات التي اتخذتها لتحقيق تلك الطموحات؟ 

الفترة دي هبدأ أعمل حفلات في كل المحافظات وهنزل معرض الكتاب بديوان ان شاء الله ، وهكون متواجد أكتر على السوشيال ميديا لحد ما اوصل لهدفي بإذن الله

من خلال تفكيرك، هل تلك الموهبة يُمكن للأخرين أن يكتسبوها بسهولة؟ أم مقتصره فقط على الموهوبين؟

انا بشوف إن الموهبة منحة ربانية وممكن تتولد الموهبة دي من البيئة المحيطة ، بصراحة صعب ان حد مش موهوب يكتسبها بالتعليم ، الموهبة بتكون 70% والدراسة والتدريب والممارسة 30% من وجهة نظري .

منذُ متى بدأت رحلتك مع تلك الموهبة؟ 

زي ما قلت كان فيه بعض المحاولات من صغري ولكن البداية الحقيقية كانت من اربع سنين  لكن عطلت نفسي كتير جدا في الاربع سنين دول ووقفت كتابة كذا مرة لمشاكل وظروف نفسية

هل لنا ببعض من أعمالك؟  

اكيد طبعا،

دكتور انا مش تعبان

ولا ينفعني أي علاج

كل الموضوع إن أنا ميت

والقلب خلاص مبقاش محتاج

مبقاش محتاج حضن يساعه

مبقاش محتاج حد بتاعه

أنا يمكن حي لكن روحي

كالصخر التايه بين أمواج

دكتور العالم كله أذاني

شوف لي علاج أو أي كريم

قلت لهم يسيبوني ف حالي

فسابوني ولكن وسط جحيم

أنا عارف إن أنا تعبان

والهم ف قلبي كتير وكمان

مهدود والكسر إحتل ضلوعي

أنا فعلا مبقيتش سليم

عمال أهرب م الواقع

وأرسم وهم واعيش جواه

واصبر نفسي بأي كلام

وانكر إني بعيش معاناة

وانكر إن الكون ده جرحني

والقى دموعي بتفضحني

ومهما بحاول أوقف دمعي

ألقى القلب بيبكي معاه

مفيش شيء هيغير حالي

تعبي مش محتاج دكتور

مهما تجيبوا علاج غالي

هفضل برضوا حزين مكسور

هفضل ءألف أي كلام

واتعب واحزن وابكي وانام

وافضل أداري ف خوفي وتعبي

لحد ما ييجي الوقت واغور

هنقول كمان قصيدة صغيرة كلماتها بتقول؛

مش لاقي مشاعر جوايا

أنا نفسي أرجع لبُگايا

ولفرحي وخوفي وٱحلامي

أنا نفسي أرجع من تاني

واحب الناس واحضنهم

أنا عايش دلوقتي بدونهم

والقلب لا حاسس بغياب

ولٱ أصلا يعني فارقة معاه

عايز أحس ولو بعذاب

عدم الإحساس ده معاناة

  دلوقتي أنا عايش گ جماد

مش قادر أحب ولا أكره

لا بقيت أفگر ف الماضي

ولا حتى خايف من بكرة

طب إمتى الحال ده يتحول

وارجع حساس زي الأول

والقلب يعود لحياته

حُزنه وفرحه وحگياته

ويعيش الدنيا بتفاصيلها

يمحي القسوة ويقتلها

بمعنى الكلمة يكون إنسان

يوم مبسوط يوم زعلان

القلب إن كان جواه فاضي

زي الغنوة بدون ٱلحان

كثير من الاشخاص تهدمهُم إنتقادات الأخرين، فما هي نصيحتُك لهُم؟ 

على فكرة انا في بدايتي كنت كده جدا يعني كنت بتأثر بأي كلمة بسهولة لكن مع الوقت عرفت ان الناس كده كده هتنتقد وكده كده هتحبط فاللي هيركز مع الحاجات اللي زي دي مش هيوصل لحاجة تماماً وهيفضل واقف في مكانه ما بيتحركش ، نصيحتي لكم إرسموا طريق حلمكم وامشوا عليه ، ما تستناش حاجة من الناس ، ركز على حلمك وبص لنفسك وطور موهبتك وإوصل بها لإبعد مكان .

لا شك أن لكُل طريق عقبات، فما هي أسلحتك لمواجهة تلك العقبات؟ 

التوكل على الله وطلب القوة منه أول سلاح

وأعتقد الثقة بالنفس سلاح مهم جدا جدا جدا ممكن نستخدمه لتخطي أي عقبة الثقة بالنفس  ثم الثقة بالنفس ثم الثقة بالنفس دي بتخلي الشخص ما يُقعش وحتى لو وقع بيرجع يقوم ويقف على رجله من غير ما حد يساعده .

كيف تُحافظ على تلك الموهبة؟ وكيف تتطور في هذا المجال؟ 

القراءة باستمرار اهم عوامل تطوير الكاتب والشاعر. لازم يكون عندي خزين كافي من الكتابات والمشاهد اللي بتساعدني في الكتابة وفي تطوير موهبتي وعقليتي بشكل عام.

هل تُساعدُك تلك الموهبة في تخطي بعض مصاعب الحياة؟ وكيف تُساعدُك؟ 

أه طبعا جدا ، اوقات كتير كانت الكتابة هى الصديق والأهل ، وكنت بلجأ لها في وقت تعبي وحُزني ، الكتابة بجد مهما جدا بكل أنواعها .

وأخيرً كلمة للجريدة: 

عاجبني جدا شغلكم وانتشاركم في الوسط الأدبي وأتمنى لكم كل النجاح والتوفيق 

شكرًا لك، ونتمنى لك كل التوفيق والنجاح. 

عادل عصام|هَمج لطيف.