مقال: كليوباترا
الباحثة: يارا الهواري
تصميم: ريم صالح
اخر ملوك الاسرة المقدونية وحكمت مصر منذ وفاة الاسكندر الاكبر لحد احتلال روما، المرأة الاسطورية التي جمعت بين الجمال والذكاء والجاذبية، أهلا بيك عزيزي القارئ موضوعنا النهاردة عن معشوقة إثنان من اقوى رجال العالم واخر سلالة البطالمة كلامنا النهاردة عن "كليوباترا السابعة"
كليوباترا كانت ابنة بطليموس الثاني عشر، واتولت العرش مكانه بعد وفاته هي واخوها بطليموس الثالث عشر، واتوصفت انها إمرأة قوية وجميلة وساحرة عكس الصورة اللي بنشوفها " وعكس الصورة اللي انا بعرضها لك دلوقت "ولكن ده مكانش السبب اللي يخلي اتنين من اقوى رجال العالم يحبوها بل كان السبب شخصيتها الذكية، بالاضافة لانها كانت موهوبة وبتتكلم كذا لغة وحكمت الجيوش بكل براعة وهي في سن 21 بس ومصر وقتها كانت دولة متقدمة ومزدهرة.
طب مين السلالة البطلمية دي؟اسس السلالة البطلمية" بطليموس الاول" ضابط حاكم مصر الاسكندر الاكبر وكليوباترا كانت ضمنها وسمت نفسها ايزيس عشان تتميز عن كليوباترا الثالثة، ولما مات ابوها الحكم راحلها هي واخوها اللي كان اصغر منها بـ 8سنين وهي وقتها كانت 18 سنة بس وعرفت انها محتاجة دعم الرومان وتحديدا "يوليوس قيصر" لو حابة تاخد العرش لوحدها
الموؤرخين قالوا ان كليوباترا وقيصر حبوا بعض لأجل مصالحهم يعني قيصر حبها عشان يسدد ديون دولته وكليوباترا حبته عشان تاخد العرش لوحدها وتسترد اراضي مصر اللي كانت "سوريا وفلسطين وقبرص"
وسافرت كليوباترا مع قيصر وكان نتيجة السفر ده "ابن غير شرعي" بطليموس الخامس عشر او "قيصرون" تصغير لاسم ابوه قيصر.
وراحت عاشت مع قيصر في روما لمدة سنتين وكانت بتتابع اخبار البلاد من بعيد لحد ما اغتيل يوليوس قيصر.
بعد اغتيال قيصر انقسمت الامبراطورية ل اتنين الامبراطورية الشرقية اللي حكمها "ماركوس انطونيوس " والامبراطورية الغربية اللي حكمها "اوكتافيوس" وفكر اوكتافيوس انه يضم مصر لروما وكانت قدامه عقبات كتير زي انطونيوس مثلا اللي كان عاوز ينفرد بالحكم لوحده، وقررت كليوباترا انها تتقرب من انطونيوس لانه ممكن فيوم يحكم روما لوحده، وانطونيوس كان متجوز "اوكتافيا" اخت اوكتافيوس وكان عامل قانون يحرم الرومان من انهم يتجوزوا غير رومانية ودي كانت مشكلته في الارتباط مع كليوباترا
ولكن كليوباترا مسكتتش وقررت انها تعيد الماضي وتغوي انطونيوس وفعلا خلفت منه التوأم " كليوباترا سيلين، الكسندر هليوس"
وسنة 37ق.م سافر انطونيوس ل سوريا بعد تدهور علاقته مع اوكتافيا وبعت لـ كليوباترا انها تروحله وهناك حطوا خطة رائعة عشان مصر تسترد شوية من اراضيها.
ورجع انطونيوس وكليوباترا مصر بعد انهيار علاقاته مع اوكتافيوس، وعملوا احتفالات في الاسكندرية وظهر فيها انطونيوس على العرش وجمبه اولاده اللي كان متأكد انهم هيكونوا ملوك روما ومصر كـ محاولة لاستفزاز اوكتافيا واكتافيوس.
سنة 32ق.م اتطلقت اوكتافيا واعلن انطونيوس جوازه من كليوباترا رسمي وفي الوقت ده كان اوكتافيوس بيجهز لحرب، وخلال سنة واحدة بس حصلت معركة "اكتيوم" وانتصر فيها اوكتافيوس واجبر انطونيوس على الهروب ورجعت كليوباترا مصر تجمع جيوشها وانضم ليها انطونيوس بعد كام اسبوع ولكن لسوء الحظ حاصرهم اوكتافيوس وخسرهم عدد كبير من السفن
وبعدها انطونيوس كان بيجهز لحرب تانية عشان يرد اعتباره وجاله خبر انتحار كليوباترا ووقتها رمى نفسه على السيف بتاعه، واكتشف بعد كدة انه كان اشاعة واتاخد وهو بيصارع الموت عشان يموت بين ايد كليوباترا.
في فجر احد ايام اغسطس كليوباترا جابت افعى سامة وخلتها تلدغها في كل جسمها عشان تموت، وقال بعض المورخين ان دراعها الشمال هو اللي اتلدغ الاول والبعض التاني قال ان "الثدي الايسر العاري" هو اللي تلقى اللدغة، وكتب المؤرخ اليوناني "كاسيوس ديو" عن موت كليوباترا وقال: "لم يعرف أحد على وجه اليقين كيف ماتت فقد وجدوا فقط ثقوبا صغيرة في ذرعها وقد افترض البعض انها جلبت أفعى صغيرة سامة لنفسها"
وبعد موتها قتل الرومان ابنها قيصرون عشان ميطالبش بالحكم
ولكن البروفيسور "كريستوف شايفر" نفى حادثة لدغ الثعبان وقال انها ماتت نتيجة شُربها توليفة من " الافيون والشوكران" دي تركيبة ملهاش طعم ولكنها بتموت بسرعة وبدون الم، ووقتها كان عمرها 39 سنة بس وقال ان لو فعلا كان في افعى في الموضوع كان هيسبب لها الم شديد وتشوه جسدي بس بدون موت
محدش يعرف مكان قبر كليوباترا فين بالظبط وكتب المؤرخ اليوناني "بلوترك"انهم اندفنوا سوا هي وانطونيوس ف قبر جمب الاسكندرية، والبعض بيقول ان قبرها نزل لاعماق البحر بعد الزلزال اللي حصل في القرن الثامن، والبعض الاخر بيقول انهم اندفنوا جمب " تابوزيريس ماجنا" وده معبد قديم فيه عشرات القبور والمومياوات.
تعليقات
إرسال تعليق