مقال: محمد علي 
الباحثة: يارا الهواري
تصميم: ريم صالح
عزيز مصر، مؤسس الاسرة العلوية، حاكم مصر من 1805 لـ 1848، اعتلى عرش مصر بعد ان بايعه اعيان البلاد ليكون والي عليها واستطاع ان يحكم مصر كل تلك الفترة وبذلك استطاع كسر العادة العثمانية التي كانت لا تسمح ان يتولي حكم مصر شخص واحد لاكثر من عامين.
اهلا بيك عزيزي القارئ من جديد، موضوعنا النهاردة عن مؤسس مصر الحديثة ، النهاردة كلامنا عن "محمد علي باشا"
محمد علي اتولد في مدينة "قولة" محافظة "مقدونيا" شمال اليونان، سنة 1769 لاسرة البانية ويقال ان والده "ابراهيم آغا" كان تاجر تبغ.
والده كان عنده 17 ولد ولكن كلهم ماتوا مفضلش الا حبيبنا "محمد علي "
مات ابو محمد علي وهو طفل وبعد فترة قصيرة حصلته امه فبقي يتيم الابوين وهو 14 سنة وتولي تربيته بعدين عمه "طوسون" اللي مات برضو وبعده رباه حاكم قولة "الشوربجي اسماعيل" وجنده ومحمد علي اثبت جدارته، وبعدها اتجوز امرأة غنية اسمها "امينة هانم" وخلفتله "ابراهيم واسماعيل وطوسون"
بعد فشل الحملة الفرنسية على مصر 1801 وتحت ضغط الانجليز على الثغور المصرية والزحف العثماني على بلاد الشام واضطراب الاوضاع في اوروبا، رجع المماليك وانقسموا لفريقين فريق انضم للانجليز بقيادة " محمد بك الالفي" اللي معداش وقت كبير الا والانجليز كانوا منسحبين تبعا لمعاهدة " امبيان" .
فريق المماليك التاني اللي كان شايف ان الانجليز واخدين كل الحقوق، ووسط كل الهيصة دي محمد علي استخدم قواته الالبانية عشان يوقع بين الطرفين عشان يظهر، بجانب توسله لكبار المناصب في مصر وقربه من الشعب وعطفه عليه
في سنة 1804 تولي حكم مصر " احمد خورشيد باشا" واللي طبعا كان حاسس بخطورة محمد علي وقواته وقدر بطريقته انه يخرج المماليك برة القاهرة وطلب من محمد علي انه يرجع الصعيد عشان يهاجمهم وبعت للـ "آستانة" انه محتاح جيش وبالفعل وصل الجيش للقاهرة ولكنه دمرها وسلب كل الاموال وده اللي خلى الشعب يغضب ويثور على خورشيد ويطالب بعزله وتولية محمد علي مكانه بقيادة عمر مكرم
وفي يوليو 1805 اصدر السلطان العثماني فرمان بعزل خورشيد وتولية محمد علي
وفي 17 يوليو من نفس السنة كان لازم ان محمد علي يواجه المماليك بقيادة " محمد بك الالفي" اللي كان الشخص المفضل للانجليز من ساعة ما ساعدهم يتخلصوا من الفرنسيين، ومعداش 3شهور الا ان المماليك قرروا غزو القاهرة وطلبوا من جنود محمد علي الانضمام ليهم ولما محمد علي عرف طلب من الجنود انهم يستدرجوهم
وتحديدا يوم الاحتفال بوفاء النيل هجم المماليك على القاهرة ووقعوا ف فخ محمد علي اللي خسرهم كتير وده اللي خلاهم ينسحبوا ومحمد علي استغل فرصته وحاربهم لحد الصعيد
اوائل 1806 محمد علي كون جيش لمحاربة المماليك بقيادة حسن باشا قائد الفرقة الالبانية اللي اشتبك مع محمد بك الالفي في الفيوم ولكن قوات محمد علي انهزمت وانسحبت لجنوب الجيزة وبعدها لبني سويف.
وفنفس الاحداث دي صدر فرمان بعزل محمد علي من ولاية مصر وتوليته حكم " سلانيك" ومحمد علي عمل نفسه موافق وانه ماشي ولكنه تحجج ان الجنود رافضين رحيله من غير ما يديهم اجورهم، وهو راح لـ " عمر مكرم" عشان يشفعله عند السلطان العثماني ويوقف الفرمان وفعلا وافق السلطان انه يوقف الفرمان مقابل ان محمد علي يدفع 4000 كيس وانه يبعت ابنه ابراهيم رهينة لحد ما يندفعوا.
خلال الحرب الانجليزية العثمانية، انجلترا بعتت حملة فيها 5000 جندي بقيادة " فريزر" لاحتلال الاسكندرية عشان يأمنوا قواعدهم ضد الدولة العثمانية في البحر المتوسط، ونزلت الحملة في شاطئ العجمي 17 مارس 1807 وبعدها راحوا الاسكندرية اللي سلمها ليهم زعيمها " امين آغا" بدون مقاومة.وقرر فريزر احتلال رشيد والرحمانية لمنع وصول الدعم عن طريق النيل
وفي 31 مارس فريزر بعت 1500 جندي بقيادة " باتريك ويشوب" لاحتلال رشيد ولكن اهالي المنطقة اتفقوا انهم يستدرجوهم لجوة المدينة من غير مقاومة واول ما دخلوا الشوارع انهالت عليهم النار من المنازل وانسحبوا لمدينة ابوقير بعد ان خسروا 185 قتيل و 300 مصاب غير الأسرى
ايه حكاية مذبحة القلعة؟ وليه قتلهم وازاي؟ خليك معايا هحكيلك
رغم ان محمد علي هزم المماليك وبعدهم عنه الا انه دايما كان خايف من خطورتهم وطبقا لاستراتيجية البلاد وهي انه يتظاهر بالمصالحة عشان يرجعهم القاهرة، ومعظم المماليك بلعوا الطُعم وراحوا القاهرة ولكن كبار المماليك شكوا في الموضوع وفضلوا يبقوا في القاهرة.
وفي ديسمبر 1907امر الوالي السلطاني " مصطفى الرابع " محمد علي انه يجهز جيش عشان يحارب الوهابيين اللي احتلوا الحجاز وبالتالي فقد السيطرة على الحرميين الشريفين ولكن محمد علي تظاهر انه مش هيقدر بسبب خناقاته مع المماليك وبعت ابنه طوسون وقرر انه يعمل حفلة بالمناسبة دي وعزم المماليك وفعلا راحوا وبعد الاكل دعاهم محمد علي انهم يسيروا في الموكب ورتب اماكنهم بحيث انهم يكونوا في المنتصف واول ما وصلوا طريق منحدر صخري الابواب اتقفلت وانحسرت خيولهم وانهالوا عليهم بالرصاص الحي!
وراح ضحية المذبحة 470 مملوك ومتبقاش الا واحد بس وقدر يهرب
اتصاب محمد علي بحالة من "جنون الارتياب" وفضل مشوش التفكير وبعدها اتصاب بالزهايمر والعلماء قالوا انها ممكن تكون حالة طبيعية نتيجة تقدم السن او ممكن تكون بسبب ادمانه "نترات الفضة" لعلاج نفسه من مرض "الزحار"
وحالته زادت سوء بسبب المصايب اللي حلت على مصر وديونها الكتيرة وزاد همه ابنه ابراهيم اللي اتصاب بالسل وراح ايطاليا للعلاج ، وبعدها زادت عليه السخونية واتصاب بالخرف فعزله ابناؤه وتولى ابراهيم باشا الحكم.
ابراهيم باشا حكم مصر 6شهور بس وبعدها مات واتولى الحكم بعده عباس حلمي ابن اخوه ووقتها كان محمد علي تعبان جدا ومحدش بلغه بوفاة ابنه وعاش كام شهر بعد موت ابراهيم ومات في الاسكندرية 2اغسطس 1849/ 13 رمضان 1265 ونقلوا جثمانه للقاهرة واندفن في المسجد اللي بناه
زوجات ومستولدات وابناء محمد علي:
-امينة هانم وخلفت "ابراهيم باشا-طوسون باشا-اسماعيل باشا-توحيدة هانم- نازلي هانم"
-أوقمش قادين
-ام نعمان وخلفت "نعمان بك"
-عين حياة قادين وخلفت "محمد سعيد باشا"
-ممتاز قادين وخلفت "حسين بك"
-ماهوش قادين "علي صديق بك"
-نام شاز قادين "محمد عبدالحليم"
-زيبة خديجة قادين "محمد علي باشا الصغير"
-شمس صفا قادين " رقية هانم-فاطمة هانم"
-شمع نور قادين "زينب هانم"
-كلفدان قادين
-نايلة قادين
-قمر قادين
تعليقات
إرسال تعليق