مقال: الملابس في مصر القديمة
الباحثة: يارا الهواري
تصميم: ريم صالح
الموضه في مصر القديمة كانت عملية وبسيطة وكانت بالنسبة للسكان هي هي نفس نوع هدوم اللي بيلبسها الستات والرجالة كانت بس نساء الطبقات العليا في المملكة المصرية لقديمة بيلبسوا هدوم اطول لكن النساء من الطبقات الدنيا كانوا بيلبسوا نفس اللبس اللي هو التنورة البسيطة زي ابائهم وازواجهم
في فترة الاسرات المبكرة والمملكة القديمة الصور بتوضح رجالة وستات من الطبقة الدنيا بيلبسوا نفس النوع، التنورة لحد الركبة ممكن تكون بيضا او لونها فاتح عامة وكانت غالبا مصنوعة من القطن او الكتان بيتم تثبيتها حول الخصر بحزام من القماش او حبل البردي او الجلد ،اما المصريين من الطبقة العليا في نفس الفترة كانوا بيلبسوا نفس الهدوم هي هي ولكن مزيد من الزخرفة من خلال المجوهرات وعشان كده بنقدر نميز الرجالة من الطبقة الغنية عن المزارعين والحرفيين.
كانت هدوم المرأة اكثر تمييزا بين الطبقات، ليه بقى؟ عشان النساء الملكات كانوا بيلبسوا فساتين مثبتة في مكانها باشرطة على الكتفين وفي بعض الاحيان كانوا بيكملوا الفستان برداء شفاف بيتلبس فوقها
ولكن قبل تطور الكتان الناس كانوا بيلبسوا ملابس مصنوعة من جلود الحيوانات او قصب البردي المنسوج والاطفال من الجنسين مكانوش بيلبسوا هدوم من يوم الولادة لحد سن البلوغ وبعض المهن كانت برضو كانت مستمرة في العادة دي زي العاملين والغسالات اللي كانوا بيغسلوا الهدوم مكانوش بيلبسوا ملابس كانوا دايما عراة عشان هما كانوا في المية كتير.
في الفترة الانتقالية الاولى وبعد انهيار المملكة المصرية القديمة وحصل تغييرات جذرية في الثقافة المصرية ولكن الازياء كانت هي هي بس في المملكة المصرية الوسطى الموضة اتغيرت والنساء بدات تلبس عبايات قطنية طويلة وبتغير شكل تصفيفات الشعر.
وفي عصر الدولة القديمة والفترة الانتقالية الاولى كانت النساء بشعر اسفل الاذنين بس في المملكة الوسطى كان الشعر لحد الكتف. كمان هدوم الدولة الوسطى بالنسبة للطبقة العليا مختلفة لانها كانت مصنوعة من القطن وغالبا بتكون فيها اكمام مع خط رقبة في الحلق والفساتين دي غالبا كانت مصنوعة من حتة واحدة الست بتلفها وبترتبها وبتحط عليها حزام حوالين الوسط.
وفي نفس الفترة كان الرجالة مستمرين في ارتداء النقبة البسيطة مع طيات في المقدمة منعرفش بالظبط ازاي المصريين طووا ملابسهم بس الصور بتوضح طيات في ملابس الرجالة والستات.
وكان اكتر انواع الهدوم شعبية بين رجال الطبقات العليا هو المئزر المثلث وهي قماشة مزخرفه نازلة فوق الركبتين بشوية و متثبتة بغطا .
بعد عصر المملكة الوسطى دخلت مصر في الفترة الانتقالية الثانية والاجانب حكموا مصر "الهكسوس" وتقريبا الهكسوس مغيروش في الموضة لانهم عجبتهم جدا الثقافة المصرية والتقاليد والمعتقدات والسلوك وهدوم المصري في شمال الدلتا
سنة 1550 قبل الميلاد الملك احمس الاول طرد الهكسوس من مصر وبدات فترة المملكة المصرية الحديثة واللي شهدت اعظم تطورات الموضة ودي تقريبا اللي كانوا بيصوروها في الافلام والبرامج التلفزيونية.وكانت الموضة وقتها جميلة جدا و الملكة احمس نفرتاري زوجة احمس متصورة بفستان باكمام مجنحة وياقة عريضة فوق الكاحل.
كمان العبايات والفساتين المزينة بالخرز بدات تظهر في اواخر الدولة الوسطى وبقت منتشرة اكتر في المملكة الحديثة بين الطبقات العليا وظهرت الباروكات المتزينة بالخرز والمجوهرات في الوقت ده كمان القبعو المصنوعة من الكتان الخالص كانت ابتكار العصر وكان شال الراس عبارة عن مستطيل من الكتان الملتوي بيتلبس فوق الفساتين ومع مرور الوقت اتحول للنمط الاكثر شعبية للطبقات العليا.
بالنسبة للرجالة الازياء اتطورت بسرعة كبيرة جدا في المملكة الحديثة كانت معظم الهدوم لتحت الركبة وكانت مطرزة بشكل متعقد اكتر وكانوا بيكملوها ببلوزة شفافة فضفاضة وكانوا بيلبسوا الصنادل او النعال .
العاملين في المرحلة دي رغم انهم كانوا دايما بيتم تصويرهم وهم عراة الا انهم بدأووا يلبسوا ويظهروا بهدومهم الكاملة
أما عن الملابس الداخلية تطورت من المئزر الخشن المثلث الملفوف بين الساقين لقطعة قماش ادق يا اما مخيطة بحجم معين من الخصر او مربوطة عند الوركين.
وفي الفترة دي كانت ملابس الرجال من الطبقة العليا هي الملابس الداخلية دي وكان بيلبسوا فوقها قميص طويل شفاف لحد الركبة واساور وصنادل، بالمناسبة تم دفن الملك توت عنخ امون ومعاه اكترمن 100 نوع من الملابس الداخلية بالاضافة للقمصان والعبايات.
مع اختلاف المهن اختلفت انماط الهدوم على سبيل المثال كان الوزراءبيلبسوا تنورة طويلة مثبتة من تحت الذراعين ونازلة على الكاحلين مع الصنادل او النعال، والكتاب كانوا بيلبسوا هدوم بسيطة من الخصر لحد الركبة واحيانا بلوزة شفافة اما الكهنة كانوا بيلبسوا هدوم من الكتان الابيض وعلى حسب كلام هيرو دوت مكانوش يلبسوا اي لون تاني غير الابيض اما عن الجنود والحراس وقوات الشرطة بيلبسوا هدوم بسيطة مع الصنادل واحيانا حامي المعصم اما عن المزارعين والحرفيين وحراس الخانات والعمال والتجار بشكل موحد في الفترة دي كانت هدومهم بسيطة وموحدة للجنسين.
تعليقات
إرسال تعليق