حوار صحفي: إسراء عزام

 مقال: الملك مينا 

الباحثة: يارا الهواري

 تصميم: منى عنتر 

الملك مينا هو مؤسس الأسرة المصرية الأولى بمدينة طيبة "الأقصر حاليًا"

وهو كمان موحد القطرين واتسمى كدة لأنه قدر يوحد الشمال والجنوب سنة 3200ق.م. وليه ألقاب كتير زي

(صاحب التاجيين- ملك الأرضيين)

اسم مينا اتذكر في مصر القديمة "ميني" ولما دورنا لقينا إن كلمة ميني معناها يؤسس أو يشيد والمؤرخيين قالوا إن كلمة ميني هي فعل مش اسم، وفي القبطية معناه الراسخ والثابت، والمصريين حرفوه لـ "مينا".

حكم مصر لمدة 62 سنة ووقتها كانت مصر مليئة بالإنجازات والسلام والأمن لأنه قدر أنه يبعد الأعداء برة البلاد ويحافظ على استقرار البلد وده اللي خلى الشعب يحبه ويعتبره الحامي ليهم.

 

كمان قدر مينا أنه يعمل عاصمة بين الشمال والجنوب واختار لها اسم "منف" وكانت محاطة بسور أبيض عشان كدة كان اسمها في الأول "مدينة الجدار الأبيض"

عمل في منف أول وأقوى حكومة مركزية للشمال والجنوب والحكومة دي قدرت إنها تحافظ على مصر كاملة من الأعداء زي النوبيين والليبين.

مينا كان أول حد استعمل الكتابة بالهيروغليفية وكان بيتعامل بيها في المعاملات التجارية،

خلال عصور ماقبل الأسرات كانوا بيستخدموا الصلايات لطحن أدوات التجميل المختلفة زي الكحل مثلا اللي وقتها كان المصريين كلهم بيستعملوه وميقدروش يستغنوا عنه،

مينا بقى قرر يكون مختلف ويستعمل الصلايات دي في كتابة انتصاراته عليها، ليه؟ لأنها كانت من الحجارة ولأن مكانش فيه معابد وقتها كانت لسة بتتبني.

سنة 1898 العالم البريطاني "كوبل" لقي الجدارية دي في مدينة الكوم الأحمر في شمال إدفو، وكان مينا مسجل عليها إنتصاراته كانت مصنوعة من الشست الأخضر، وحاليًا نقدر نزورها في المتحف المصري في القاهرة.

مينا تزوج من "نيت حتب" وكانت أميرة من الشمال وهو من الجنوب وطبعًا كان زواجهم زي داعم للوحدة، وتم الزواج بعد ما قدر إنه يخلي المملكة الشمالية تحت حكمه وطبًعا لأنه ذكي اختار زوجته من الشمال عشان يضمن انهم يصونوا البلد وميفرطوش فيها، وأنجب منها ابنه الوحيد "حور عحا" اللي بقي ملك بعده.

في مرة وهو بيمارس هوايته المفضلة وهي صيد الحيوانات والطيور وكان لوحده وقرر انه يصيد فرس النهر ولكن للأسف ضربة الرمح مموتش فرس النهر وهجم على مينا وموته بعد ما صرخ صرخته الأخيرة اللي سمعها الحراس وجريوا عليه لكنه كان مات فقتلوا فرس النهار انتقامًا ليه ونقلوا جثة الملك لمنف وحنطوه وكفنوه وحطوه في تابوت حجري ومشيوا بيه للسفينة عشان تنقله لمكانه في الجنوب.

ودع الشعب ملكهم العظيم في منظر مهيب واندفن في أبيدوس في المقبرة اللي جهزها لنفسه.

وعن أصوله شوية بيقولوا أن أصله للملك "نارمر" وشوية تانيين خالص بيرجحوا أنه هو أصلا الشخصيتين.

قولولي انتوا رأيكوا ايه؟

يارا الهواري|همج لطيف