ديوان شعر بالعامية "سيناريو"
الشاعر: مصطفي الزنقلي
انفصام
أنا أو هوا مش فارقه
اتنين في واحد يكملوا الفرقه
قلبك دَ ولا حقل تجارب
أو قلب شايل ناس وفيها قلوب فارغه
أنا أو هوا مش عارفني مين فيهم
الساذج الطيب
عايش عشان ازرع في أراضيهم
و اشرب مرار الألم ثم اواسيهم
القاسي الشرير
صاحب مرار الكاس
إنسان بدون احساس
مريض عايش مقتول
و بيكرهه الإخلاص
أنا مش عارفني مين فيهم
اتنين في قلبي محبوسين جوا
الصبح شخص سعيد
و الصبح غير الليل
بالليل بكون هوا
اتنين في قلبي محبوسين جوا
مش عارف اسمع شخص فيهم أو أركز معاه
اسمع كلام الأول مفهمش أي معناه
اسمع كلام التاني اتحمل المعاناه
انسان مريض نفسي
مقسوم إلي نصين
معرفش فين العدل
وانا وجعي كان ضعفين
جوايا شخص حزين
برايا شخص سعيد
الحزن لو يختفي
برجع بحزن جديد
علطول بقول فينك
كنتي الوحيده ال تقدر تمنع انشطار الروح
كنتي السبب في النوم و قلبي خالي جروح
مكسور يارب ومش عارفني أنا مين
جوا خير أو شر مش عارف امشي لي فين
يارب انا مش بخير
جوا شخص اتنين تلت اربع أشخاص
كلامهم بارد و ثقيل
مؤذي زي الرصاص
لو يوم يفارق حد
افضل سعيد حبه
وقلبي يبقى خلاص
مكسور ضعيف جدا
أنا مش جبل علشان استحمل الاتنين
دلوقتي وانا بكتب معرفش أنا مين
القلب مات م الوقفه في الشارع
و الشعر مش عارف يشكي جراحه ل مين
و العقل ضاع بين السهر و الشعر
متباع بدون نظر للسعر
اتمنى نخلص بقا
من جرح مش بيذول
والله لو كان سم
كان انتهى المفعول
كما يمكنك معرفة المزيد عن الكاتب عبر حوار صحفي "مصطفي الزنقلي"
تعليقات
إرسال تعليق