قصة "الحب يغير كل شيء"
نيرة حسن
دخلت المسجد علشان في درس النهاردة فكنت داخلة بس مش متحمسة أوي الدنيا كانت قايمة بالواجب معايا بس يشاء ربنا إني قبل ما الدرس يبدأ تتغير نفسيتي تمامًا
لقيت بنت بشعرها واقفة وعمالة تعيط ودموعها مش راضية تقف قربت منها و سألتها "اسمك ايه يا جميلة؟ " مجاوبتنيش ففضلت واقفة جنبها لقيتها مره واحدة بصتلي و قالت لي
_كنتِ بتكلميني أنا
_ أه يا حبيبتي كنت بكلمك أنتِ
_ بس أنا مش جميلة
_ مش جميلة إزاي؟
_ انا أقل واحدة في صحابي في الجمال كلهم حلوين أوي إلا أنا هم بيحطوا ميكاب وحاجات كتير أنا مبحطش بس هم فعلًا ملامحهم أحسن
_ طب هو أنتِ مقتنعة إنه دا مقياس
_ لا مش قصدي بس هم كمان عندهم ناس بتحبهم أنا لا أنا محدش بيحبني أنا حتى أهلي مش بيحبوني
_ مين قال كده
_ هم اللي قالوا كانوا عايزني ولد بس طلعت بنت ودا شيء مكرههم فيَّ و صحابي مبيحبونيش أنا موجودة زي مش موجودة بل بحس إن وجودي بيضايقهم
_ طب إهدي كده وتعالي نقعد نتكلم بالراحة و نشوف المواضيع الخطيرة دي بس أقولك على سر؟
_ سر إيه؟
_ مش أنا اللي قتلت مُفاسا
ضحكت ما بين دموعها وقالت لي
_ بس أنا عارفة إن مش أنتِ أقولك ليه؟
_ ليه؟
_ علشان اسكار اللي قتل مُفاسا
ضحكنا و بعدين خدتها ع جنب وقعدنا و قولتلها
_ طب أعرف اسم القمر بقا
_ نسيم
_ اسمك حلو أوي طيب بقا يا برنسيس قولتيلي محدش بيحبك طب أقولك إني مش عندي مشكلتك بصراحة لإن أنا بحب و حبيبي بيحقق لي كل اللي أنا عيزاه يعني مهما طلبت إلا لو حاجة هتأذيني و يمكن من غير ما أطلب لا مش يمكن هو كتير أوي من غير ما أطلب و لما أعمل حاجة مش بيحبها لما أقول أني مش هعملها تاني بيسامحني ع طول و بيفرح بيا كمان كل لما أتضايق بقوله و بيحليلي مشاكلي و لما أفرح بقوله أنا بقوله على كل حاجة عارفة لما تكوني متأكدة إنك مهما عكيتي الدنيا فأنتِ عارفة مين هيحلها فبتروحيله على طول
فكرة وجود ناس كتير في حياتي كويسة بس هم حاجة بسيطة أوي و الله هم أهلي و أصحابي و بحبهم بس أقل من حبي له كتير أنا بحبه أكتر ما بحب نفسي
_ حبيبك جميل أوي يا ريت يكون حبيبي كده
ابتسمت
_ حبيبي هو الله جل جلاله خلقنا وأعطانا نعم كتير اوووي ومع ذلك قليل لما حد بيشكر وبيحمد أنتِ بتقولي أهلك مش بيحبوكِ بس موجودين و دي نعمة و أنتِ في نعم كتيرة غافلة عنها أقولك دلوقتي تخيلي لو وأنتِ بتاكلي الاكل نزل في الرئة هتموتي!
بس ربنا سبحانه و تعالى منع دا طب و أنتِ بتتنفسي مش ممكن حاجة تقفل مجرى التنفس و تموتي؟! طب وأنتِ نايمة بالليل مش ممكن قلبك يقف؟
في حاجات كتير أوي لا يمكن أعدها ربنا أنعم عليكِ بيها طب أنتِ بتقولي إنك أقل واحدة في صحابك في الجمال تعرفي إن ربنا خلقك جميلة أوي أنتِ شايفة نفسك مش حلوة بس في كتير نفسهم في شكلك دا و الله أنتِ مش جميلة بمقاييسهم بس أنتِ جميلة بمقاييس حد تاني الجمال نسبي أنتِ بس مميزة في جمالك يعني مثلًا في ناس كتير بتحب الورد أنا بحب دوار الشمس بتختلف من واحد للتاني
_ بس أنا ربنا مش هيحبني حتى لو حبيته أنا وحشة عملت ذنوب كتير
_ يااه مين قال برضو أنتِ مين علشان تقولي كده دا ربنا سبحانه وتعالى بيقول
ورحمتي وسعت كل شيء
أنتِ بقا هتختصري رحمة ربنا ع حاجة معينه
طب أقولك أنتِ لما تتوبي ربنا بيفرح بيكِ أوي ربنا سبحانه و تعالى بيفرح بيكِ أكتر من شخص كان معاه ناقة (جمل) عليه أكل و شرب و هو في الصحراء فالجمل سابه و مشى فقال لو مش الحيوانات جت أكلتني فأنا هموت من العطش و الجوع
ونام شوية و بعدين صحى لقى الجمل رجع فمن فرحته قال اللهم إنك عبدي و أنا ربك
من فرحته اتلغبط فتخيلي بقا ربنا يفرح بيكِ أكتر من الشخص دا
_ طب بس أنا عملت حاجات كتير تدخلني النار
_ سبحان الله هو أنتِ في إيدك جنة و نار يا بنتي دي علمها عند ربي أنتِ إدعي و ربنا إن شاء الله يتقبل
_ يعني هو هيسمعني و يتقبل مني؟
_ربنا سبحانه و تعالى بيقول
و إذا سألك عبادي عني فإني قريب
ربنا سبحانه و تعالى قريب أوي أقرب لكِ من حبل الوريد وحده عالم باللي في قلبك واللي أنتِ حساه كل شئ يعلمه الله
_ بجد يعني هيقبلني ويغفر ذنوبي
_ لا
_ لا ايه مش هيغفر ذنوبي
_ لا مش بس هيغفرها دا هيبدلك كل دا حسنات كمان
_ يعني ممكن أتوب و أرجع و كل دي حسنات
_ أيوه ينفع طبعًا
_ طب أنا عايزة رضا ربنا أنا عيزاه يحبني
_ ربنا سبحانه و تعالى يحبك مادام جعل حبه همك
_ طب أعمل أيه
_ تعالى إحضري معايا الدرس دا
أنا النهارده واقفة قدام المسجد اللي داخلة أسمع محاضرة دعوية لنسيم اللي بقا اليوم اللي بتيجي فيه المسجد بيتملي ما شاء الله نساء وبنات وطفلات صغيرات واللهم بارك شكلهم مبهج أوي وبقت محفظة قرآن ومعاها علم شرعي و لا أزكيها على الله هي كان قلبها طيب فربنا زرع حبه في قلبها و عوضها و هي حاليًا متزوجة من داعية إسلامي اللهم بارك و عندها عبد الرحمن و يوسف و عائش و حفص و اللهم بارك ذرية صالحة مصلحة عبدالرحمن خاتم القرءان وحاليًا ١٠ سنوات عائشة حافظة ١٥ جزء و هي ٧ سنوات يوسف ٨ أجزاء وهو ٥ سنوات و حفصة لسه بيبي صغيرة ربنا يجعلها ذرية صالحة زي إخواتها و النهارده أقدر أقول إن حب ربنا بيغير وبيغير أوي وإن كل واحد فينا حتى لو له ماضي فربنا عفو غفور وسبحان مقلب القلوب.
تعليقات
إرسال تعليق